Invito al buŝa praktikado:
Esperanto-parolantoj altabliĝu!

Nun ses jarojn ekzistas en Berlino Esperanta babilrondo specife dediĉita al samtempa uzado de du ĉefaj funkcioj buŝaj: kiel esprimilo de ideoj kaj opinioj kaj ĝuilo de manĝaĵoj kaj trinkaĵoj. Tiu invito do celas Esperanto-parolantojn kiuj ŝatas babiladi en leĝera, amikeca etoso ĉirkaŭ tablo provizita je frandindaĵoj, malkovrante kuirartojn el diversaj landoj. En tiu ĉi nova grupo oni parolu laŭte nur Esperanton, flustre kun siaj najbaroj – kaj pli laŭte kun la kelneraro! – oni rajtos uzi ankaŭ la germanan aŭ iun ajn alian lingvon. Tiaj renkontoj povas havi utilan kromefikon: mirigi kaj interesigi ĉirkaŭulojn pri Esperanto.

Ni kuniĝas ĉiumonate la lastan vendredon je la 20a horo, en ĉiufoje alia restoracio konsilita de partoprenantoj. La unuan fojon, en Septembro 2004, ni renkontiĝis en azia vegetara restoracio, poste sekvis i.a. greka, germana, tajlanda, japana, meksika, ktp.

La venonta vespero okazos la 26an de novembro 2010 en restoracio

Macedonia
Hans-Sachs-Str. 4f
12205 Berlin (tuj apud S-stacio Lichterfelde West)
(loko sur Berlina urbomapo)

Espereble tiu invito tiklos vian intereson kaj apetiton kaj ni povos renkontiĝi multnombre por evidentigi ke eblas paroli Esperanton ankaŭ … plenbuŝe. Pro rezervo de tablo partoprenemuloj bv. anoncu sin ĝis la 24a de novembro retpoŝte per philipp*.b*audonn*t@gmx.n*t (anstataŭigu ĉiun asteriskon per la litero "e").

Vizitu regule tiun ĉi paĝon por ekscii kiam kaj kie okazos la venonta renkonto.